سری لنکن کرکٹ ٹیم کی 8 سال بعد پاکستان آمد

ملک میں انٹرنیشنل کرکٹ کی تاریخ کا یادگار دن آگیا اور 8 سال بعد سری لنکن ٹیم کے کھلاڑی لاہور پہنچ گئے۔

پاکستانی کرکٹ ٹیم ایمریٹس کی پرواز ای کے 622 کے ذریعے رات 2 بجےجبکہ مہمان ٹیم اتحاد ائیرلائن کی پرواز ای وائے 241 کے ذریعے رات 2 بجکر 25 منٹ پر لاہور ائیرپورٹ پہنچیں جہاں ان کا پنجاب حکومت اور پی سی بی کے اعلیٰ حکام نے پرتباک استقبال کیا۔

ائیرپورٹ پر ٹیموں کی حفاظت کے لیے پولیس، فوج اور رینجرز نے سکیورٹی کے فرائض انجام دیے جبکہ ائیرپورٹ سے مال روڈ پر واقع نجی ہوٹل تک تمام داخلی اور خارجی راستوں پر چاک و چوبند اہلکاروں کو تعینات کیا گیا۔

دونوں ٹیموں کو حج لاؤنج سے بلٹ پروف گاڑیوں میں بٹھا کر سخت سیکورٹی کے حصار میں نجی ہوٹل تک پہنچایا گیا۔ ہوٹل پہنچنے پر شائقین کرکٹ نے تالیاں بجا کر مہمان ٹیم کا والہانہ استقبال کیا۔

ہوٹل پہنچنے پر سری لنکن ٹیم کے کپتان تھیساراپریرا کا کہنا تھا کہ وہ آج پاکستان کے ساتھ ہونے والے میچ میں بہترین کارکردگی دکھانے کی کوشش کریں گے۔

پاکستان اور سری لنکن کرکٹ ٹیموں کے مابین آج شام 6 بجے قذافی اسٹیڈیم میں تیسرا اور آخری ٹی 20 میچ کھیلا جائے گا۔ پاکستان کی ٹیم پہلے ہی 2 ٹی 20 میچ جیت کر سیریز اپنے نام کر چکی ہے۔

قذافی اسٹیڈیم لاہور مہمان سری لنکن کرکٹ ٹیم کی میزبانی کے لئے تیار ہے جہاں ٹی ٹوئنٹی میچ کے لئے تمام تر انتظامات مکمل کر لئے گئے ہیں۔

Leave a Reply

Your email address will not be published. Required fields are marked *