قطر میں افغان طالبان کے سیاسی دفتر کے ترجمان سہیل شاہین کا کہنا ہے کہ وہ امریکا سے سمجھوتے کے قریب پہنچ گئے ہیں۔

افغان طالبان کے نمائندوں اور امریکا کے درمیان قطر کے دارالحکومت دوحا میں امن مذاکرات کا 9 واں دور جاری ہے جس میں معاہدے کو حتمی شکل دی جارہی ہے۔

اس حوالے سے قطر میں افغان طالبان کے سیاسی دفتر کے ترجمان سہیل شاہین نے سوشل میڈیا پر اپنے بیان میں کہا ہے کہ دوحہ میں امریکا طالبان مذاکرات آج بھی جاری رہیں گے جب کہ وہ مذاکرات میں سمجھوتے کے قریب پہنچ گئے ہیں۔ انہوں نے کہا کہ امید ہےکہ مسلمان اور آزادی کے چاہنے والے جلد اچھی خبر سنیں گے۔

 تاہم افغان طالبان کے بیان پر کابل میں امریکی سفارتخانے نے کوئی ردعمل نہیں دیا ہے۔ گزشتہ روز اس حوالے سے افغان طالبان کے ترجمان کا کہنا تھا کہ مذاکرات میں طالبان نے امریکا کو افغان سرزمین کو کسی کے خلاف حملے میں استعمال نہ کرنے کی ضمانت دی ہے اور ساتھ ہی غیرملکی افواج کی واپسی کیلئے محفوظ راستہ فراہم کرنے کی یقین دہانی کرائی ہے۔

واضح رہے کہ امریکا کی جانب سے نمائندہ خصوصی برائے افغان امن عمل زلمے خلیل زاد افغان طالبان نمائندوں سے مذاکرات کررہے ہیں جنہیں امریکی صدر ڈونلڈ ٹرمپ نے پورا اختیار دے رکھا ہے۔