برطانوی پارلیمنٹ کے سامنے کشمیریوں پر مظالم کیخلاف احتجاج کیا جائے گا،وزیرخارجہ

اسلام آباد: وزیر خارجہ شاہ محمود قریشی نے کہا ہے کہ 4 اور 5 فروری کو لندن میں برطانوی پارلیمنٹ کے سامنے مقبوضہ کشمیر میں مظالم کے خلاف احتجاج کیا جائے گا۔

ایکسپریس نیوز کے مطابق وزیر خارجہ شاہ محمود قریشی کا آل پارٹیز حریت کانفرنس کے چیئرمین میر واعظ عمر فاروق سے ٹیلی فونک رابطہ ہوا ہے جس میں مسئلہ کشمیر اور بھارتی مظالم کو عالمی سطح پر اجاگر کرنے کے امور پر بات چیت کی گئی۔

اس موقع پر وزیر خارجہ کا کہنا تھا کہ پاکستان نے مقبوضہ کشمیر میں انسانی حقوق کی خلاف ورزیوں کا معاملہ ہر فورم پر اٹھایا ہے اور اس سلسلے کو برقرار رکھتے ہوئے 4 اور 5 فروری کو لندن میں برطانوی پارلیمنٹ کے سامنے مقبوضہ کشمیر میں مظالم کے خلاف احتجاج کیا جائے گا جب کہ ساتھ ہی لندن میں کشمیریوں پر ہونے والے مظالم پر تصویری نمائش کا بھی انعقاد کیا جائے گا۔…